二零零八年一月十九日19 JAN 2008

星島日報  唯一

在《東周刊》「金牌之選」頒獎禮上遇見一哥楊貫一，見他喜上眉梢，攞完特區銅紫荊星章，又眾望所歸奪得「金牌廚神」榮譽，正是雙喜臨門。今晚我就約齊港姐曹敏莉、葉翠翠，仲有國際中華小姐陳爽一齊來賀一賀一哥！
雖然一哥講過唔鍾意畀人神化，可以將「廚房佬」形象洗脫已經心滿意足，但我就話只係一哥為人謙厚，深明「滿招損，謙受益」的道理。我極之同意，所以我最多都係自封「金牌經理人」，唔敢叫自己「金牌經理神」，哈哈哈！

一哥楊貫一榮獲特區銅紫荊星章，表揚他對香港飲食文化的貢獻，領獎時，曾特首囑咐一哥煮好鮑魚為港增光，實有惺惺相惜之意。我今晚約齊港姐曹敏莉、葉翠翠，仲有國際中華小姐陳爽一齊來賀一哥，承諾我哋會盡情食好呢餐飯！

鮑魚以外
一哥主理的富臨飯店，名氣響噹噹，世界各地的老饕皆慕名而至，我曾經疑惑還需要我來錦上添花嗎？後來我想通了，去富臨唔一定要食鮑魚，其他各色小菜一樣有一哥的風範。老實講，名氣響有時會令大眾望而卻步，今晚我就要親口示範鮑魚以外的美食。
「唔係話賣貴嘢就叫得做名店，我哋每個菜式、每樣材料和每種做法，都要優勝過人。」一哥話鮑參翅肚固然係貴價食材，要悉心炮製，但簡單如一碟醬料都不能夠馬虎。「好似呢碟用來點鯪魚餅的蜆蚧汁，開封後要幾多即用幾多，因為蜆蚧一遇空氣就會變黑，用剩的唔可以再畀客人。」聽罷我即時夾件鯪魚餅點蜆蚧食，嘩，粒蜆肉大到可以送酒！
一哥話近年所有貴價食材來貨價以倍數上升，都係因為國內經濟起飛，供不應求。「二十頭網鮑成本要千七蚊，最靚的花膠維到萬八蚊斤，好多人誤會以為高檔食肆利錢深，其實非也，愈高檔，食材成本愈貴，客人食落肚嘅成數愈高。」第二個講我信六成，一哥講，我信十足，仲明白乜嘢叫物有所值，再加埋一哥同成班夥計的用心，咁就物超所值啦！

忍出彩虹
在座三位靚女，我最早識的是Mandy曹敏莉，佢同我講起近況。「去完紐約讀了一年珠寶鑑證重返TVB，參與了《舞動奇跡》比賽，雖然練到周身傷，但就學到好多嘢。月尾將開拍新劇，同劇有三哥（苗僑偉）同靚靚（袁詠儀），我就飾演女保鑣，要打口架，可能我跳舞生硬好似打功夫喇，哈哈！」
在我眼中三位都係未雕琢的寶玉，所謂玉不琢不成器，惟有爭取每個演出機會，做到最好，先至可以得到觀眾認同。正如一哥的金句：「人無我有，人有我優，人優我要更優！」翠翠若有所思，正在琢磨緊呢句話的深層意義。忽然，佢站起身話要同我乾一大杯，「Paco、一哥，好多謝你哋今晚請我哋食飯又提點我哋，呢杯一定要乾咗佢！」話口未完就喝個底朝天。我當然奉陪到底，反正啱啱食完一碗燜大鱔，正好用威士忌burn走啲fat！
飲完酒，我問翠翠最想演甚麼角色，佢諗咗一陣，「我想演奸角，仲要係大奸大惡嗰種，做鄰家女孩觀眾唔會記得。記得喺英國讀書時我一路追睇《創世紀》，對劇中的奸角好有印象。羅嘉良同我講：『要專心拍劇，等好的角色。』我會好好記住。」
坐在翠翠旁邊的一哥剛剛親手為我哋炒了個飯，回來聽見翠翠講起嘉良的一番話，好有同感。「未成功之前要忍。我年輕時，每次遇到別人不懷好意的責難，我就會咁樣回答：『等我遲啲至覆你。』我相信忍係可以出彩虹！」
好嘢！一哥，我以為我多金句，誰不知一哥一係唔開口，一開口就字字珠璣。忍出彩虹絕對係一哥入行五十多年來的智慧結晶，不過……我睇今晚就用唔着。

（左起）曹敏莉、陳爽和葉翠翠問我點keep fit，我話早餐食十足，午飯就七成，晚飯五成就夠。佢哋異口同聲咁話：「惟有當呢餐係早餐！」

來自哈爾濱的陳爽在港日子尚短，如此非同凡響的粵菜還是第一次吃。曹敏莉也說食到最後的南瓜餡蒸包都充滿驚喜，兩人不能不來個合照。

翠翠站起身話要同我乾一大杯，話口未完就喝個底朝天，我當然奉陪到底！